Kahapon at Bukas

Parang kahapon lamang nang iyong sinabi

Na ika’y lilisan saglit sa aking tabi

Bagama’t ang puso ko ay nag-atubili

Ikaw ay lumisan nang sumapit ang gabi

Hindi ko napansin ang paglipas ng mga taon

At sa wari ko ika’y lumisan lamang kahapon

Ang kalungkutan ay pilit na ibinaon

Sa aking puso ikaw pa rin ang naroon

Hindi ka nilimot kahit na isang saglit

Mga ala-ala mo ang laging nasa isip

Mga ngiti mo sa isip ko ay di nawaglit

Ang mga tukso ay iniwasan kong pilit

Bukas aking mahal kung ikaw ay darating

Kahit saglit sana ako’y iyong dalawin

At kahit ako’y natutulog ng mahimbing

Sa tinig mo ako’y kaagad na gigising

At dumating nga ang inaasam na bukas

Tuwa sa puso ko ay sadyang mababakas

Subalit maraming oras na ang lumipas

Kahit anino mo ay hindi ko namalas

Tuwa sa puso ko ay napalitan ng lungkot

Bakit aking mahal ikaw ay nakalimot

Sa ating tagpuan ay hindi ka sumipot

Ngayo’y lungkot ang sa puso ko’y bumabalot