Nasaan na ang kahapon
na pinagsaluhan
ng dalawang puso
na nagmamahalan?
Nasaan na ang pangako
ng pag-ibig na wagas
na sa dako pa roon
ay magsasama hanggang wakas?
Nasaan na ang panahon
ng pagtatampisaw
sa buhos ng ulan
at masasayang araw?
Nasaan na ang halik
at higpit ng yakap
na nagbibigay ng init
at buhay sa mga pangarap?
May pusong lumuluha
sa bawat paglisan,
lungkot at pighati
sa pusong naiiwan.
Nasaan, nasaan,
ang madalas na katanungan,
subalit walang napapala
bagkus hungkag na kasagutan.